Panflötengruppe Pancanto Wichtrach
Wir stellen uns vor
Barbara Däppen, d Frohnatur
D'Barbara, ä Frohnatur, aber doch öpper wo genau weiss was si wot.
Nach em Motto: Immer vorwärts luege im Läbe, was hinger eim liegt chame sowieso nümme ändere.
I ihrem Gwafförgschäft isch si im Elemänt. D'Chunde z'verschönere isch äbeso ä Leideschaft vo ihre wie ds Flötle.
D'Panflöte git ihre dr nötig Usglich im Läbe u het desswäge sehr ä höche Schteuewärt.
Ou ds zämesi u d'Fründschaft ir Gruppe isch ihre sehr wichtig. Drum chunnt si ou immer wieder uf nöii, wenn o mängisch chli verruckti Idee.
Näbe dr Liebi zur Panflöte het sie ou no chli ds Fernweh im Bluet. Wes Zyt zuelat u dr Terminkaländer Lücke het, findet sie immer wieder äs nöis Reisezieu.
Ulrich Hauri, dr Usglichnig
Dr Ueli isch ä liebenswärti, usglichni Persönlichkeit wo geng bemüeht isch, das ir Gruppe aues richtig u grächt ablouft.
Di erschte Gehversüech mit dr Panflöte het är churz vor sire Pensionierig bir Elisabeth Mettler gmacht. I sim dritte Läbesabschnitt isch Panflötespiele zu sim gröschte Hobby worde. Äs isch spür- u hörbar was ihm d'Flöte bedütet. Ihm macht ds Üebe u ds Ufträte mit dr Gruppe sehr Spass. Gselligkeit u Fründschafte z'pflege si ihm sehr wichtig.
Wenn är zwüschedüre chli früschi Luft brucht, isch är öppe mit dr Wandergruppe ufere Tour a z'träffe.
Churz, dr Ueli, ä bodeschtändige, härzensguete Mönsch.
Monika Amstutz, di Begeischterigsfähigi
D'Monika brucht geng chli Asporn. Aber weme se de für öppis cha Begeischtere, de isch si de mit Lib u Seeu derbi.
Zum Panflötespile isch si eigentlich cho, wüu me se het überredet. Zum Glück, wüu hüt isch ds Panflötespiele ihri grossi Leideschaft. Da si sehr ehrgizig isch, üebt si fasch täglich u isch mit sich fasch nie z'fride. Äs Läbe ohni Musig z'mache, cha si sich fasch nümm vorschteue.
O näbe dr Musig wirds ihre nie längwilig. Si macht no Fuesspfleg u hiuft ihre Schwöschter im Gwafförsalon us. Si liebt dr Umgang mit Lüt.
Ds choschtbarschte u wichtigschte isch ihr d'Familie.
Ir Gruppe füehut si sich puduwohl. Mit liebe Fründe Musigmache us schön u luschtig ha, das isch es was sie brucht u ihre guet tuet.
Dr Peter isch ir Gruppe däjenig wo d'Vorschleg i Tat umsetzt. Äbe dr Macher. Für jede Wunsch u jedi Sorg het är äs offnigs Ohr.
We är nid grad mit sim laschtwage ungerwägs isch, de bout är d'Hektik u dr Stress bim Panflöteschpile ab.
Är hett vor zwöi Jahr churz vor eme 'Burnout' agfange Panflöte spile. Är hett zu däm Zytpunkt gmerkt, dass är i sim Läbe öppis mues ändere. Panflöte, mit ihrne harmonische Kläng hei ihm bis hüt sehr guet ta. Äs het ihn wieder zu emene glückliche, usglichne Mönsch gmacht.
D'Musig begleitet ihn dür ds Läbe. Früecher het är im Jodlerchörli Bärgarve mitgsunge u hüt spieut är mit vieu Fröid u Leideschaft Panflöte.
Dr Kurt het us Musiglehrer jedes Jahr 350 Schuelchind unterrichtet u mit vieu Fröid mit ihne Musicals ufgfüehrt.
Musig het für ihn e grosse Schteuewärt. Ds Musiziere mit de Paner u die gueti Kameradschaft gniesst är sehr.
Zur Gruppe gschtosse isch är, wüu me sich isch einig gsi, dass ä Keyboardbegleitig schöner isch aus äs Playback.
D'Panflötler chöi druf zeue, dass dr Kurt seit wie ä schwirigi Steu im Lied musikaisch korräkt muess töne. Är isch o dä wo Begleitige für d'Panstück schribt.
Näbem Musige findet me dr Kurt vieu im Garte u wenn är niene ume isch, de isch är wahrschinli grad ufere Reis.